Канаш районӗнчи пӗр ялта пурӑнакан арҫынна йывӑҫ каснӑшӑн явап тыттарӗҫ.
64 ҫулти ҫын Канашри вӑрман хуҫалӑхне шар кӑтартнӑ. Пурӗ 150 пин тенкӗ ытлалӑх.
Йывӑҫ каснине вырӑнти йӗрке хуралҫисем утӑ уйӑхӗнче тупса палӑртнӑ.
Арҫын тӗлӗшпе РФ Пуҫиле кодексӗн 260-мӗш статйин 3-мӗш пайӗпе пуҫиле ӗҫ пуҫарнӑ. Ватӑ ҫын йӗрке хуралҫисене хыра киле валли каснине пӗлтернӗ.
Чӑваш Енӗн Шалти ӗҫсен министерствинче пӗлтернӗ тӑрӑх, пуҫиле ӗҫе тӗпчесси малалла пырать.
Элӗк районӗнче пурӑнакан арҫынна хӗрарӑма чӗрӗлле ҫунтарса янӑшӑн суд тӑвӗҫ.
Пӑтӑрмах 2021 ҫулхи ҫурла уйӑхӗн 7-мӗшӗнче пулса иртнӗ. 32 ҫулти арҫын хӑй паллакан 30 ҫулти хӗрарӑмпа хӑйӗн килӗнче, Элӗк районӗнчи Чӑлкассинче, мунчара пулнӑ. Ӳсӗрскер хайхипе хирӗҫсе кайнӑ.
Диван ҫинче выртакан хӗрарӑма вӑл ҫунтарса яма шухӑшланӑ. Ампартан канистрӑпа бензин илсе килнӗ те хӗрарӑма сапнӑ, унтан — мунча пӳртемне кӗмелли алӑка.
Пиҫсе кайнӑ тата тӗтӗм-сӗрӗмпе чыхланса кайнӑ хӗрарӑм вилсе кайнӑ.
Арҫын тӗлӗшпе пуҫарнӑ пуҫиле ӗҫе суда ярса панӑ.
Кӑҫалхи пуш уйӑхӗн 24-мӗшӗнче Шупашкарти Ленинград урамӗнче вырнаҫнӑ нумай функциллӗ центрта лифт персе аннине Чӑваш халӑх сайчӗ пӗлтернӗччӗ. Аса илтерер: инкек 15 сехет ҫурӑра пулса иртнӗ. Ҫав вӑхӑтра унта никам та пулман, ҫавӑнпа ҫынсем шар курман. Лифт 8-мӗш хутран ӳкнӗ. Вӑл вӑйлах арканнӑ.
Прокуратура тӗпчевӗ палӑртнӑ тӑрӑх, лифта техника тӗлӗшӗнчен тӗрӗслеменни ҫиеле тухнӑ. Лифт хуҫи — «Ленинградская, 36» тулли мар яваплӑ общество. Организацире лифта ӗҫлеттерессишӗн яваплӑ ҫын та пур.
Халӗ яваплисен хӑйсем ӗҫлесе ҫитерейменшӗн явап тытма тивӗ. Пӑтӑрмах тӗлӗшпе пуҫиле ӗҫ пуҫарнӑ.
Ҫӗмӗрле районӗнчи Вырӑс Улхашӗнчи ферма ҫивиттине витнӗ тимӗре такам вӑрлама пуҫланӑ. Пурлӑх пӗчӗккӗн-пӗчӗккӗн ураланнӑ.
Ферма япӑха-юхӑна пуҫланӑ пулин те унӑн хуҫин вӑрра иртӗхтерес килмен. Пуҫтаха тупса палӑртма йӗрке хуралҫисенчен пулӑшу ыйтнӑ.
Пакунлисем вӑрра йытӑпа шыранӑ. Титан Кросс ятлӑ полици йытти кирлӗ йӗр ҫине тӳрех лекнӗ. Вӑл пытанса ларнӑ каччӑсен тӗлне ҫитсе тухнӑ.
18-19 ҫулсенчи ҫамрӑксем хӑйсен айӑпне ҫийӗнчех йышӑннӑ, анчах фермӑн хуҫи пуррине вӗсем пӗлмен те иккен.
Чӑваш Енри ача-пӑча уйлӑхӗнче ферма уҫнӑ. Выльӑх-чӗрлӗхӗнне мар-ха. Майнинг-ферма.
Саккуна пӑсса ӗҫлекен ҫав заведени Ҫӗрпӳ районӗнчи «Звездный» ача-пӑча уйлӑхӗнче тӗпленнӗ.
Вӗренӳ учрежденийӗн директорӗ тӗлӗшпе пуҫиле ӗҫ пуҫарнӑ. Майнинг-ферма энергетиксене 800 пин тенкӗ ытлалӑх тӑкак кӳнӗ.
Криповалюта хатӗрлекен оборудовани уйлӑхӑн столовӑйӗнче пӗлтӗрхи чӳк уйӑхӗнченпе кӑҫалхи ака уйӑхӗччен ӗҫленӗ.
Оборудование кам кӗртсе вырнаҫтарнине тӗпчевҫӗсем палӑртӗҫ. Директор тӗлӗшпе пуҫарнӑ пуҫиле ӗҫе малалла тӗпчеҫҫӗ.
Шупашкарта килсӗр-ҫуртсӑр пӗр арҫын ҫыннӑн велосипедне вӑрласа кайнӑ.
35 пин тенкӗ тӑракан икӗ урапаллӑ транспорт ҫухални ҫинчен йӗрке хуралҫисене 45 ҫулти хӗрарӑм ҫу уйӑхӗн 12-мӗшӗнче евитленӗ. Шар курни пӗлтернӗ тӑрӑх, велосипеда хулан Ҫурҫӗр-хӗвеланӑҫ районӗнчи Лукин урамӗнчи ҫуртӑн пӗрремӗш хутӗнче тӑратса хӑварнӑ.
Йӗрке хуралҫисем ют велосипеда килсӗр-ҫуртсӑр ҫын вӑрласа кайнине палӑртнӑ. 60 ҫулти арҫын тӗлӗшпе пуҫиле ӗҫ пуҫарнӑ. Вӑл ҫавӑн пек ытти преступление те туман-ши тесе тӗрӗслеҫҫӗ.
РФ Следстви комитечӗн Чӑваш Енри управленийӗн тӗпчевҫисем кондитер фабрикинче ӗҫлекен хӗрарӑм аманнӑ тӗслӗхпе пуҫиле ӗҫ пуҫарнӑ. Вӗсем палӑртнӑ тӑрӑх, предприятире ӗҫ хӑрушсӑрлӑхӗн правилисене пӑхӑнман.
Инкек кӑҫалхи ака уйӑхӗн 5-мӗшӗнче 15 сехет те 20 минутра пулнӑ. Шупашкарти предприятисенчен пӗринчи кондитер цехӗнчи газ кӑмакин операторӗ вафли кӑмакине тасатнӑ. Хӗрарӑм аллине кӑмакана чиксе ярсан сылтӑм ал лапписӗр тӑрса юлнӑ.
Ҫывӑх вӑхӑтра суд экспертизисем иртӗҫ, кӳнтеленсенчен ыйтса пӗлеҫҫӗ. Пуҫиле ӗҫе малалла тӗпчеҫҫӗ.
Шупашкар хулинче 16 тата 17 ҫулсенчи ҫамрӑксем пирки пуҫарнӑ пуҫиле ӗҫе тӗпчесе пӗтернӗ. Вӗсене ҫынна малтанласа калаҫса татӑлса, хӗҫпӑшал евӗр япалапа усӑ курса ҫаратнӑшӑн явап тыттарӗҫ.
Пӑтӑрмах кӑҫалхи кӑрлач уйӑхӗн 26-мӗшӗнче Шупашкарти нумай хваттерлӗ ҫуртсенчен пӗрин подъездӗнчи 4-мӗш хутра пулса иртнӗ.
Ӳсӗр икӗ ҫамрӑк хӑйсем унччен палламан 37 ҫулти хӗрарӑма тапӑннӑ. Пӗри ӑна водка кӗленчипе пуҫӗнчен ҫапнӑ, тепри хӗрарӑмӑн карас телефонне туртса илнӗ. Хӗрарӑма ҫапла майпа 10 пин тенкӗ ытлалӑх шар кӑтартнӑ.
Яшсен тӗлӗшпе пуҫарнӑ пуҫиле ӗҫе тӗпчевҫесем суда ярса панӑ.
Шупашкар хулинче пӗр арҫын 14 ҫулти хӗрача ҫумне ҫулӑхнӑ. Усал шухӑшлӑ арҫын лавккаран тухакан 14 ҫулти пикене асӑрханӑ. Вӑл ӑна аллинчен ярса илнӗ те общество чарӑнӑвӗн хыҫне илсе кайнӑ. Унта хайхи этем хӗрача ҫумне ҫулӑхма тытӑнса кайнӑ.
Пӑтӑрмаха ҫулпа иртсе пыракан машинӑри арҫын асӑрханӑ. 34 ҫулти Владимир Григорьев автомбильтен чупса тухса пырса вӑл хӗрачана пулӑшнӑ. Арҫынна халӗ Раҫҫей Следстви комитечӗн Тав хучӗпе чыслама тӑратнӑ.
Шупашкар хулинче 41 ҫулти арҫын тӗлӗшпе пуҫиле ӗҫ пуҫарнӑ. Вӑл такама тапса-ҫапса пӗтермен, ҫынна та ҫаратман, вӑрӑ ӗҫӗпе те аппаланман, машинӑпа ҫын ҫине те пырса кӗмен. Хӑйӗн ячӗпе организаци уҫнӑ.
Ҫынсене усламҫӑ пулма та, предприяти-организаци уҫма та чаракан ҫук-ха. Анчах хайхи этем организацие суйса уҫнӑ. Ӑна пӗрисем ҫапла тума ыйтнӑ та, вӑл килӗшнӗ. Ахаль мар, паллах. Хайхине укҫалла тав тума калаҫса татӑлнӑ.
Ҫапла вара ҫӗнӗ организацие Патшалӑхӑн пӗрлехи реестрне кӗртнӗ, налук учетне тӑратнӑ. 41 ҫулти арҫын суя учредитель тата ертӳҫӗ пулса тӑнӑ.
+13.3 °C